"FDA SDA ಪರೀಕ್ಷೆಗೆ ಕನ್ನಡ ವರ್ಣಮಾಲೆ ನೋಟ್ಸ್"

 

ಕನ್ನಡ ವರ್ಣಮಾಲೆ 

ಕನ್ನಡ ವ್ಯಾಕರಣದ ಅಡಿಪಾಯವೇ ವರ್ಣಮಾಲೆ. ವರ್ಣ ಎಂದರೆ ಅಕ್ಷರ, ಮಾಲೆ ಎಂದರೆ ಜೋಡಣೆ. ಕನ್ನಡ ಭಾಷೆಯನ್ನು ಶಾಸ್ತ್ರೀಯವಾಗಿ ಕಲಿಯಲು ಅಕ್ಷರಗಳ ಉಗಮ, ವರ್ಗೀಕರಣ ಮತ್ತು ಉಚ್ಚಾರಣಾ ಕ್ರಮಗಳನ್ನು ತಿಳಿಯುವುದು ಅತ್ಯಗತ್ಯ.

೧. ಅಕ್ಷರಗಳ ಸಂಖ್ಯೆ ಮತ್ತು ಸ್ವರೂಪ

ಪ್ರಸ್ತುತ ಕನ್ನಡದಲ್ಲಿ ೪೯ ಅಕ್ಷರಗಳನ್ನು ಅಧಿಕೃತವಾಗಿ ಬಳಸಲಾಗುತ್ತದೆ. ಇವುಗಳನ್ನು ನಾವು ಮೂರು ಪ್ರಮುಖ ವಿಭಾಗಗಳಾಗಿ ವಿಂಗಡಿಸುತ್ತೇವೆ:

ಸ್ವರಗಳು: ೧೩

ಯೋಗವಾಹಗಳು: ೦೨

ವ್ಯಂಜನಗಳು: ೩೪

೨. ಸ್ವರಗಳು - ೧೩

ಸ್ವತಂತ್ರವಾಗಿ ಉಚ್ಚರಿಸಲ್ಪಡುವ ಅಕ್ಷರಗಳನ್ನು 'ಸ್ವರಗಳು' ಎನ್ನುತ್ತಾರೆ. ಸ್ವರಗಳನ್ನು ಅವುಗಳ ಉಚ್ಚಾರಣಾ ಕಾಲದ (ಮಾತ್ರಾಕಾಲ) ಆಧಾರದ ಮೇಲೆ ಮೂರು ವಿಧಗಳಾಗಿ ವಿಂಗಡಿಸಬಹುದು:

ಅ) ಹೃಸ್ವಸ್ವರ

ಒಂದು ಮಾತ್ರಾ ಕಾಲದಲ್ಲಿ (ಕಣ್ಣು ಮಿಟುಕಿಸುವ ಅಥವಾ ಚಿಟಿಕೆ ಹೊಡೆಯುವ ಸಮಯ) ಉಚ್ಚರಿಸುವ ಅಕ್ಷರಗಳು.

ಅಕ್ಷರಗಳು: ಅ, ಇ, ಉ, ಋ, ಎ, ಒ (ಒಟ್ಟು ೬).

ವೈಶಿಷ್ಟ್ಯ: ಇವು ಮೂಲ ಸ್ವರಗಳು. ಇವುಗಳನ್ನು ದೀರ್ಘವಾಗಿ ಎಳೆಯಲು ಬರುವುದಿಲ್ಲ.

ಆ) ದೀರ್ಘಸ್ವರ

ಎರಡು ಮಾತ್ರಾ ಕಾಲದಲ್ಲಿ ಉಚ್ಚರಿಸುವ ಅಕ್ಷರಗಳು.

ಅಕ್ಷರಗಳು: ಆ, ಈ, ಊ, ಏ, ಓ (ಒಟ್ಟು ೫).

ವೈಶಿಷ್ಟ್ಯ: ಇವುಗಳನ್ನು ಉಚ್ಚರಿಸುವಾಗ ಧ್ವನಿಯನ್ನು ಎಳೆಯಬೇಕಾಗುತ್ತದೆ. ಸಂಧಿಕಾರ್ಯಗಳಲ್ಲಿ ಇವುಗಳ ಪಾತ್ರ ದೊಡ್ಡದು.

ಇ) ಪ್ಲುತಸ್ವರ

ಮೂರು ಅಥವಾ ಅದಕ್ಕಿಂತ ಹೆಚ್ಚು ಮಾತ್ರಾ ಕಾಲದಲ್ಲಿ ಉಚ್ಚರಿಸುವ ಅಕ್ಷರಗಳು. ಇವುಗಳಿಗೆ ಪ್ರತ್ಯೇಕ ಚಿಹ್ನೆ ಇಲ್ಲದಿದ್ದರೂ, ಬರವಣಿಗೆಯಲ್ಲಿ ಸಾಮಾನ್ಯವಾಗಿ ಅಕ್ಷರದ ಮುಂದೆ '೩' ಎಂಬ ಅಂಕಿಯನ್ನು ಅಥವಾ ದೀರ್ಘ ಎಳೆತವನ್ನು ಸೂಚಿಸಲಾಗುತ್ತದೆ.

ಉದಾಹರಣೆ: ಅಮ್ಮಾ..., ಅಣ್ಣಾ..., ಲೇಯ್... (ದೂರದ ವ್ಯಕ್ತಿಯನ್ನು ಕರೆಯುವಾಗ ಬಳಸಲಾಗುತ್ತದೆ).

ಈ) ಸಂಧ್ಯಕ್ಷರಗಳು

ಎರಡು ಸ್ವರಗಳ ಸೇರುವಿಕೆಯಿಂದ ಉಂಟಾಗುವ ಅಕ್ಷರಗಳು.

ಐ (ಅ+ಇ/ಈ) ಮತ್ತು ಔ (ಅ+ಉ/ಊ).

ಇವುಗಳನ್ನು ದೀರ್ಘಸ್ವರಗಳ ಪಟ್ಟಿಯಲ್ಲೇ ಸೇರಿಸಲಾಗಿದೆ ಏಕೆಂದರೆ ಇವುಗಳ ಉಚ್ಚಾರಣೆಗೆ ಎರಡು ಮಾತ್ರಾ ಕಾಲ ಬೇಕು.

೩. ಯೋಗವಾಹಗಳು - ೦೨

'ಯೋಗ' ಎಂದರೆ ಸಂಬಂಧ, 'ವಾಹ' ಎಂದರೆ ಹೊಂದುವುದು. ಸ್ವತಂತ್ರವಾಗಿ ಅಸ್ತಿತ್ವವಿಲ್ಲದ, ಕೇವಲ ಸ್ವರ ಅಥವಾ ವ್ಯಂಜನಗಳ ಜೊತೆ ಸೇರಿ ಮಾತ್ರ ಉಚ್ಚರಿಸಲ್ಪಡುವ ಅಕ್ಷರಗಳೇ ಯೋಗವಾಹಗಳು.

ಅನುಸ್ವಾರ (ಂ): ಉದಾಹರಣೆ - ಅಂ, ಕಂ, ಸಂ.

ವಿಸರ್ಗ (ಃ): ಉದಾಹರಣೆ - ಅಃ, ದುಃಖ, ಅಂತಃಕರಣ.

೪. ವ್ಯಂಜನಗಳು- ೩೪

ಸ್ವರಗಳ ಸಹಾಯದಿಂದ ಮಾತ್ರ ಉಚ್ಚರಿಸಲು ಸಾಧ್ಯವಿರುವ ಅಕ್ಷರಗಳನ್ನು ವ್ಯಂಜನಗಳು ಎನ್ನುತ್ತಾರೆ. ವ್ಯಂಜನಗಳಲ್ಲಿ ಎರಡು ಮುಖ್ಯ ವಿಧಗಳಿವೆ:

A. ವರ್ಗೀಯ ವ್ಯಂಜನಗಳು- ೨೫

ಇವುಗಳನ್ನು ಉಚ್ಚಾರಣಾ ಸ್ಥಾನಗಳ ಆಧಾರದ ಮೇಲೆ ಐದು ವರ್ಗಗಳಾಗಿ ವಿಂಗಡಿಸಲಾಗಿದೆ. ಪ್ರತಿಯೊಂದು ವರ್ಗದಲ್ಲೂ ೫ ಅಕ್ಷರಗಳಿರುತ್ತವೆ.

ವರ್ಗ ಅಲ್ಪಪ್ರಾಣ ಮಹಾಪ್ರಾಣ ಅಲ್ಪಪ್ರಾಣ ಮಹಾಪ್ರಾಣ ಅನುನಾಸಿಕ

ಕ-ವರ್ಗ     ಕ ಖ ಗ ಘ ಙ

ಚ-ವರ್ಗ   ಚ ಛ ಜ ಝ ಞ

ಟ-ವರ್ಗ.   ಟ ಠ ಡ ಢ ಣ

ತ-ವರ್ಗ      ತ ಥ ದ ಧ ನ

ಪ-ವರ್ಗ      ಪ ಫ ಬ ಭ ಮ

ವಿವರಣೆ:

ಅಲ್ಪಪ್ರಾಣ: ಕಡಿಮೆ ಉಸಿರು ಅಥವಾ ಪ್ರಾಣಶಕ್ತಿ ಬಳಸಿ ಉಚ್ಚರಿಸುವ ಅಕ್ಷರಗಳು (೧ನೇ ಮತ್ತು ೩ನೇ ಸಾಲು).

ಮಹಾಪ್ರಾಣ: ಹೆಚ್ಚಿನ ಉಸಿರು ನೀಡಿ ಒತ್ತಿ ಉಚ್ಚರಿಸುವ ಅಕ್ಷರಗಳು (೨ನೇ ಮತ್ತು ೪ನೇ ಸಾಲು).

ಅನುನಾಸಿಕ: ಮೂಗಿನ ಸಹಾಯದಿಂದ ಉಚ್ಚರಿಸುವ ಅಕ್ಷರಗಳು (೫ನೇ ಸಾಲು).

B. ಅವರ್ಗೀಯ ವ್ಯಂಜನಗಳು - ೦೯

ಇವುಗಳನ್ನು ಯಾವುದೇ ನಿರ್ದಿಷ್ಟ ವರ್ಗಕ್ಕೆ ಸೇರಿಸಲು ಬರುವುದಿಲ್ಲ.

ಅಕ್ಷರಗಳು: ಯ, ರ, ಲ, ವ, ಶ, ಷ, ಸ, ಹ, ಳ.

೫. ಉಚ್ಚಾರಣಾ ಸ್ಥಾನಗಳು 

ವ್ಯಾಕರಣದಲ್ಲಿ ಪ್ರತಿಯೊಂದು ಅಕ್ಷರವು ಬಾಯಿಯ ಒಂದು ನಿರ್ದಿಷ್ಟ ಭಾಗದಿಂದ ಹುಟ್ಟುತ್ತದೆ. ಇದನ್ನು ಪಾಣಿನೀಯ ಶಿಕ್ಷೆಯ ಪ್ರಕಾರ ಹೀಗೆ ವಿವರಿಸಬಹುದು:

ಕಂಠ್ಯ: ಗಂಟಲಿನಿಂದ ಹುಟ್ಟುವವು - ಅ, ಆ, ಕ, ಖ, ಗ, ಘ, ಙ, ಹ, ವಿಸರ್ಗ.

ತಾಲವ್ಯ: ಅಂಗಳಿನಿಂದ ಹುಟ್ಟುವವು - ಇ, ಈ, ಚ, ಛ, ಜ, ಝ, ಞ, ಯ, ಶ.

ಮೂರ್ಧನ್ಯ: ನಾಲಿಗೆಯನ್ನು ಮಡಚಿ ಅಂಗಳಿನ ಮೇಲ್ಭಾಗಕ್ಕೆ ಮುಟ್ಟಿಸಿದಾಗ ಹುಟ್ಟುವವು - ಋ, ಟ, ಠ, ಡ, ಢ, ಣ, ರ, ಷ, ಳ.

ದಂತ್ಯ: ಹಲ್ಲುಗಳ ಸಹಾಯದಿಂದ - ತ, ಥ, ದ, ಧ, ನ, ಲ, ಸ.

ಓಷ್ಠ್ಯ: ತುಟಿಗಳ ಸಹಾಯದಿಂದ - ಉ, ಊ, ಪ, ಫ, ಬ, ಭ, ಮ.

ಕಂಠತಾಲವ್ಯ: ಗಂಟಲು ಮತ್ತು ಅಂಗಳಿನಿಂದ - ಎ, ಏ, ಐ.

ಕಂಠೌಷ್ಠ್ಯ: ಗಂಟಲು ಮತ್ತು ತುಟಿಗಳಿಂದ - ಒ, ಓ, ಔ.

ದಂತೌಷ್ಠ್ಯ: ಹಲ್ಲು ಮತ್ತು ತುಟಿಗಳಿಂದ - ವ.

೬. ಗುಣಿತಾಕ್ಷರಗಳು

ವ್ಯಂಜನಕ್ಕೆ ಸ್ವರ ಸೇರಿದಾಗ 'ಗುಣಿತಾಕ್ಷರ'ವಾಗುತ್ತದೆ.

ಸೂತ್ರ: ವ್ಯಂಜನ + ಸ್ವರ = ಗುಣಿತಾಕ್ಷರ (ಕ + ಅ = ಕ, ಕ + ಆ = ಕಾ).

ಇವುಗಳನ್ನು ಬರೆಯುವಾಗ ಸ್ವರ ಚಿಹ್ನೆಗಳನ್ನು (ತಲೆಕಟ್ಟು, ಇಳಿ, ಕೊಂಬು ಇತ್ಯಾದಿ) ಬಳಸುತ್ತೇವೆ.

೭. ಸಂಯುಕ್ತಾಕ್ಷರಗಳು / ಒತ್ತಕ್ಷರಗಳು

ಎರಡು ಅಥವಾ ಎರಡಕ್ಕಿಂತ ಹೆಚ್ಚು ವ್ಯಂಜನಗಳು ಸ್ವರದ ಸಹಾಯವಿಲ್ಲದೆ ಒಂದಕ್ಕೊಂದು ಸೇರಿ, ಕೊನೆಯಲ್ಲಿ ಒಂದು ಸ್ವರದ ಸಹಾಯದಿಂದ ಉಚ್ಚರಿಸಲ್ಪಡುವುದೇ ಸಂಯುಕ್ತಾಕ್ಷರ.

ಸಜಾತಿ ಸಂಯುಕ್ತಾಕ್ಷರ: ಒಂದೇ ಜಾತಿಯ ಎರಡು ವ್ಯಂಜನಗಳು ಸೇರುವುದು (ಉದಾ: ಅಮ್ಮ, ಅಕ್ಕ, ಹಬ್ಬ).

ವಿಜಾತಿ ಸಂಯುಕ್ತಾಕ್ಷರ: ಬೇರೆ ಬೇರೆ ಜಾತಿಯ ವ್ಯಂಜನಗಳು ಸೇರುವುದು (ಉದಾ:

 ಸೂರ್ಯ, ಪಶ್ಚಿಮ, ವಿದ್ಯಾ).